گردوں کی بیماری کی 6 اہم علامات، ماہرین نے بروقت تشخیص پر زور دے دیا -

ماہرین صحت نے خبردار کیا ہے کہ گردوں کے امراض میں تیزی سے اضافہ ہو رہا ہے اور ابتدائی علامات کو نظر انداز کرنا سنگین پیچیدگیوں کا سبب بن سکتا ہے۔ طبی ماہرین کے مطابق گردے انسانی جسم کے اہم اعضا ہیں جو خون کو صاف کرکے فاضل مادوں اور اضافی پانی کو پیشاب کے ذریعے خارج کرتے ہیں۔

ماہرین کا کہنا ہے کہ گردوں کی بیماری کے آغاز میں اکثر کوئی واضح علامت ظاہر نہیں ہوتی، تاہم مرض بڑھنے کے ساتھ جسم میں مختلف تبدیلیاں سامنے آ سکتی ہیں۔

گردوں کی خرابی کی نمایاں علامات میں پیشاب میں تبدیلی شامل ہے، جس میں بار بار پیشاب آنا، رات کے وقت زیادہ پیشاب آنا، جھاگ دار پیشاب، پیشاب میں خون آنا یا پیشاب کرنے میں دشواری شامل ہیں۔

اسی طرح جسم کے مختلف حصوں خصوصاً پیروں، ٹخنوں، ہاتھوں، چہرے اور آنکھوں کے گرد سوجن بھی گردوں کی کمزور کارکردگی کی نشانی ہو سکتی ہے، کیونکہ متاثرہ گردے اضافی سیال کو جسم سے خارج نہیں کر پاتے۔

طبی ماہرین کے مطابق مسلسل تھکاوٹ، جسمانی کمزوری اور خون کی کمی بھی گردوں کے امراض سے منسلک ہو سکتی ہے۔ اس کے علاوہ جلد کی خارش، خشکی اور دانوں کا نمودار ہونا بھی ان علامات میں شامل ہے جو جسم میں زہریلے مادوں کے جمع ہونے کی وجہ سے پیدا ہوتی ہیں۔

متلی، الٹی، بھوک میں کمی، پیٹ بھرا محسوس ہونا اور سانس کی بدبو بھی گردوں کی خرابی کی ممکنہ علامات ہیں، جبکہ پٹھوں میں درد اور کھچاؤ جسم میں معدنیات کے عدم توازن کی نشاندہی کر سکتے ہیں۔

ماہرین نے بتایا کہ Type 2 Diabetes اور Hypertension گردوں کی دائمی بیماری اور گردے فیل ہونے کی سب سے بڑی وجوہات ہیں۔ انہوں نے خاص طور پر شوگر اور ہائی بلڈ پریشر کے مریضوں کو مشورہ دیا ہے کہ وہ گردوں کے باقاعدہ ٹیسٹ کروائیں تاکہ کسی بھی مسئلے کی بروقت تشخیص اور علاج ممکن ہو سکے۔