ایرانی صدر کے استعفے کی خبروں کی تردید، حکومت اور پاسدارانِ انقلاب میں اختلافات کی اطلاعات -

اسلام آباد(کیپٹل ٹائمز نیوز ڈیسک)ایرانی صدر Masoud Pezeshkian کے مبینہ استعفے سے متعلق خبروں نے سیاسی حلقوں میں ہلچل مچا دی ہے۔ بعض بین الاقوامی میڈیا رپورٹس میں دعویٰ کیا گیا ہے کہ صدر نے اپنا استعفیٰ سپریم لیڈر کے دفتر کو ارسال کر دیا ہے۔

رپورٹس کے مطابق صدر پزشکیان نے مبینہ طور پر اپنے خط میں مؤقف اختیار کیا کہ اہم ریاستی فیصلوں میں انہیں اور دیگر اعلیٰ حکومتی عہدیداروں کو نظر انداز کیا جا رہا ہے، جبکہ اختیارات کا مرکز پاسدارانِ انقلاب (IRGC) کی قیادت بنتی جا رہی ہے۔

میڈیا رپورٹس میں یہ بھی دعویٰ کیا گیا ہے کہ صدر نے موجودہ حالات میں حکومتی امور چلانے اور اپنی آئینی ذمہ داریاں ادا کرنے میں مشکلات کا ذکر کرتے ہوئے مستعفی ہونے کی درخواست کی ہے۔

بین الاقوامی ذرائع کے مطابق صدر پزشکیان اور پاسدارانِ انقلاب کی قیادت کے درمیان اختلافات کی بنیادی وجوہات میں حالیہ جنگی حکمتِ عملی، اس کے معاشی اثرات اور عوام کو درپیش مشکلات شامل ہیں۔ جنگ کے بعد ایران کی معیشت اور عوامی زندگی پر بڑھتے ہوئے دباؤ کے باعث سیاسی تناؤ میں اضافہ دیکھنے میں آیا ہے۔

تاہم ایرانی حکومت نے صدر کے استعفے سے متعلق تمام خبروں کو سختی سے مسترد کرتے ہوئے انہیں بے بنیاد قرار دیا ہے۔ حکومتی حکام کا کہنا ہے کہ صدر اپنے فرائض معمول کے مطابق انجام دے رہے ہیں اور استعفے کی اطلاعات میں کوئی صداقت نہیں۔