نیویارک کے گٹروں میں اترنے والے پراسرار افراد کون؟ پولیس نے تحقیقات شروع کر دیں -

اسلام آباد(کیپٹل ٹائمز نیوز ڈیسک)New York City میں گٹروں میں اترنے اور واپس باہر آنے والے افراد کی عجیب و غریب ویڈیوز سامنے آنے کے بعد پولیس نے تحقیقات کا آغاز کر دیا ہے۔

غیر ملکی میڈیا رپورٹس کے مطابق حالیہ ہفتوں کے دوران سوشل میڈیا پر متعدد ویڈیوز وائرل ہوئی ہیں جن میں کئی افراد کو شہر کے سیوریج سسٹم میں داخل ہوتے اور بعد میں باہر نکلتے دیکھا جا سکتا ہے۔

امریکی میڈیا نے پولیس ذرائع کے حوالے سے بتایا ہے کہ Brooklyn اور Queens کے علاقوں میں نصب سی سی ٹی وی کیمروں میں بھی ایسے افراد ریکارڈ ہوئے ہیں۔ حکام کو شبہ ہے کہ یہ لوگ گٹروں میں قیمتی اشیاء یا دیگر سامان کی تلاش میں اتر رہے ہیں۔

پولیس کے مطابق ان واقعات کے حوالے سے متعدد شکایات موصول ہوئی ہیں، جس کے بعد تحقیقات کا دائرہ وسیع کر دیا گیا ہے تاکہ ان افراد کی شناخت اور ان کے مقاصد کا تعین کیا جا سکے۔

حکام نے خبردار کیا ہے کہ نیویارک کے سیوریج سسٹم میں داخل ہونا نہ صرف غیر قانونی ہے بلکہ انتہائی خطرناک بھی ہے، کیونکہ گٹروں میں مہلک گیسیں، آلودہ پانی، زہریلے مادے اور دیگر صحت کے لیے نقصان دہ عناصر موجود ہوتے ہیں۔

پولیس کا کہنا ہے کہ تحقیقات مکمل ہونے تک اس معاملے کے تمام پہلوؤں کا جائزہ لیا جا رہا ہے۔