دوحہ ڈائمنڈ لیگ میں ارشد ندیم کی شرکت غیر یقینی، فیصلہ 8 سے 10 روز میں کریں گے -

اسلام آباد(کیپٹل ٹائمز نیوز ڈیسک)پاکستان کے اولمپک گولڈ میڈلسٹ جیولین تھرور Arshad Nadeem نے کہا ہے کہ 19 جون کو ہونے والی دوحہ ڈائمنڈ لیگ میں شرکت کے حوالے سے ابھی حتمی فیصلہ نہیں کیا گیا اور وہ آئندہ 8 سے 10 روز میں اپنی شرکت یا عدم شرکت کا اعلان کریں گے۔

حج کی سعادت حاصل کرنے کے بعد ارشد ندیم نے اپنے کوچ Salman Iqbal Butt کی نگرانی میں پنجاب اسٹیڈیم لاہور میں دوبارہ ٹریننگ کا آغاز کر دیا ہے۔ ٹریننگ سیشن کے دوران گفتگو کرتے ہوئے انہوں نے کہا کہ اپنی موجودہ فارم اور فٹنس کا جائزہ لینے کے بعد دوحہ ڈائمنڈ لیگ میں شرکت کا فیصلہ کریں گے۔

ارشد ندیم کا کہنا تھا کہ اس سیزن میں ان کی توجہ ایشین گیمز، کامن ویلتھ گیمز اور ورلڈ ایتھلیٹکس الٹی میٹ چیمپیئن شپ جیسے بڑے ایونٹس پر مرکوز ہے۔ انہوں نے کہا کہ حال ہی میں سری لنکا کے ایک جیولین تھرور کی 92 میٹر سے زائد تھرو نے مقابلے کو مزید سخت بنا دیا ہے، جس کے باعث وہ اپنی تیاریوں پر بھرپور توجہ دے رہے ہیں۔

انہوں نے حج کی ادائیگی پر خوشی کا اظہار کرتے ہوئے کہا کہ کم عمری میں حج کی سعادت حاصل کرنا ان کے لیے بڑی نعمت ہے۔ ان کا کہنا تھا کہ حج کے بعد وہ خود کو ذہنی اور جسمانی طور پر بہت ہلکا محسوس کر رہے ہیں اور دوبارہ ٹریننگ شروع کرتے ہوئے ایسا لگ رہا ہے جیسے وہ وہیں سے آغاز کر رہے ہیں جہاں سے چھوڑا تھا۔