مرحوم اداکار شفیع محمد شاہ کی بیٹی ارسلانہ محمد شاہ دل کا دورہ پڑنے سے انتقال کر گئیں -

اسلام آباد(کیپٹل ٹائمز نیوز ڈیسک)پاکستان کے نامور مرحوم اداکار Shafi Muhammad Shah کے خاندان پر ایک اور صدمہ ٹوٹ پڑا ہے، ان کی صاحبزادی ارسلانہ محمد شاہ اچانک دل کا دورہ پڑنے کے باعث انتقال کر گئیں۔

یہ افسوسناک خبر مرحوم اداکار کی دوسری صاحبزادی نے سوشل میڈیا پر ایک جذباتی پیغام کے ذریعے مداحوں تک پہنچائی۔ ان کے مطابق ارسلانہ محمد شاہ کو اچانک ہارٹ اٹیک ہوا جس کے نتیجے میں وہ دنیا سے رخصت ہو گئیں۔

ارسلانہ محمد شاہ میڈیا انڈسٹری سے بھی وابستہ تھیں اور مختلف ٹی وی چینلز میں اسسٹنٹ ڈائریکٹر اور ڈائریکٹر کے طور پر خدمات انجام دے چکی تھیں۔ اہل خانہ کے مطابق ان کی اصل پہچان ان کی پیشہ ورانہ مہارت نہیں بلکہ ان کا نرم دل، انسان دوست اور ہمدرد رویہ تھا۔

خاندانی بیان کے مطابق ارسلانہ محمد شاہ سیٹ پر ہر فرد کے ساتھ عزت و محبت سے پیش آتی تھیں اور خاموشی سے ضرورت مندوں کی مدد کیا کرتی تھیں۔ ان کے انتقال پر اہل خانہ اور شوبز حلقوں میں گہرے رنج و غم کا اظہار کیا جا رہا ہے۔