شوبز کی سیاست نے کئی بار دل توڑا”

پاکستانی شوبز انڈسٹری کے معروف گلوکار و اداکار Ali Zafar نے انکشاف کیا ہے کہ انڈسٹری کے سیاسی ماحول نے انہیں کئی بار اپنا کیریئر چھوڑنے پر مجبور کر دیا تھا۔

حال ہی میں ایک پوڈکاسٹ میں گفتگو کرتے ہوئے علی ظفر نے اپنے جذبات کا کھل کر اظہار کیا۔ انہوں نے کہا کہ وہ دل سے ایک فنکار ہیں اور شوبز میں صرف تخلیقی کام کرنے کے جذبے کے ساتھ قدم رکھا تھا، مگر وقت کے ساتھ جب اس شعبے میں سیاست اور ذاتی مفادات شامل ہوئے تو یہ چیز ان کے لیے ذہنی طور پر مشکل بنتی چلی گئی۔

انہوں نے کہا کہ “میں اپنے کام سے بے حد محبت کرتا ہوں اور مجھے پاکستان سے بے پناہ عزت ملی، لیکن جب آپ ایک معصوم نیت کے ساتھ آئیں اور پھر ماحول بدلتا ہوا دیکھیں تو انسان خود بھی بدلنے لگتا ہے۔ ایسے لمحات آئے جب میں نے سنجیدگی سے سوچا کہ شاید سب کچھ چھوڑ دینا ہی بہتر ہو۔”

یاد رہے کہ علی ظفر اور Meesha Shafi کے درمیان طویل قانونی تنازع بھی ان کے کیریئر کا ایک مشکل مرحلہ رہا، جو تقریباً 8 سال تک جاری رہا۔ اس دوران ابتدائی طور پر ان کے کیریئر کو دھچکا لگا، تاہم وہ اپنے کام اور مستقل مزاجی کے باعث دوبارہ خود کو منوانے میں کامیاب رہے۔

علی ظفر نے اس بات پر بھی زور دیا کہ مشکل وقت میں ان کے اہلِ خانہ کی حمایت ان کے لیے سب سے بڑی طاقت ثابت ہوئی، جس نے انہیں ہر آزمائش سے نکلنے کا حوصلہ دیا۔

ان کا کہنا تھا کہ تمام تر چیلنجز کے باوجود ان کی اصل پہچان ایک فنکار کی ہے، اور وہ آج بھی تخلیقی کام کو ہی اپنی زندگی کا مقصد سمجھتے ہیں۔