طلاق کے بعد خود کو سنبھالنے کا سفر، زارا ترین نے دل کی بات کہہ دی -

اسلام آباد(کیپٹل ٹائمز نیوز ڈیسک)زارا ترین نے طلاق اور جذباتی صدمے کے بعد اپنی زندگی میں آنے والی تبدیلیوں پر کھل کر اظہارِ خیال کیا ہے۔ وہ حال ہی میں ایک شو میں مہمان بنیں جہاں انہوں نے اپنی نجی زندگی، ذہنی کیفیت اور خود کو دوبارہ سنبھالنے کے سفر سے متعلق گفتگو کی۔

یاد رہے کہ زارا ترین کی شادی فاران طاہر سے ہوئی تھی، تاہم بعد ازاں دونوں کے درمیان علیحدگی ہوگئی۔ اس مشکل دور کے بعد اداکارہ نے کچھ عرصے تک شوبز سرگرمیوں سے بھی دوری اختیار کیے رکھی۔

گفتگو کے دوران زارا ترین نے کہا کہ اس وقت ان کی توجہ نئی محبت یا رومانس پر نہیں بلکہ اپنی ذہنی اور جسمانی صحت بہتر بنانے پر مرکوز ہے۔ ان کے مطابق وہ اپنی زندگی کے ایسے مرحلے میں ہیں جہاں وہ خود کو وقت دے رہی ہیں اور ماضی کے تلخ تجربات سے سیکھنے کی کوشش کر رہی ہیں۔

اداکارہ نے اعتراف کیا کہ ایک وقت ایسا بھی تھا جب وہ شدید ذہنی اذیت کا شکار تھیں اور آگے بڑھنا ان کے لیے مشکل ہو گیا تھا، تاہم اب وہ اپنی زندگی کو نئے انداز سے سمجھنے کی کوشش کر رہی ہیں۔

زارا ترین کا کہنا تھا کہ تنہائی انسان کی سوچ اور شخصیت دونوں کو بدل دیتی ہے، جبکہ خود کے ساتھ وقت گزارنے سے انسان اپنی کمزوریوں اور فطرت کو بہتر انداز میں سمجھ پاتا ہے۔ انہوں نے مزید کہا کہ وہ اب خود کو بہتر طریقے سے جاننا چاہتی ہیں تاکہ مستقبل میں ماضی کی غلطیاں دوبارہ نہ دہرائیں۔