ایڈم زیمپا نے آئی پی ایل کے طویل شیڈول پر سوال اٹھا دیا، پی ایس ایل کو ترجیح دینے کی وجہ بتا دی -

آسٹریلوی لیگ اسپنر ایڈم زیمپا نے کہا ہے کہ انڈین پریمیئر لیگ کا طویل دورانیہ غیر ملکی کھلاڑیوں کے لیے مشکل ثابت ہوتا ہے، جس کے باعث انہوں نے اس سیزن میں پاکستان سپر لیگ کو ترجیح دی۔

لاہور میں ایک انٹرویو کے دوران زیمپا نے کہا کہ مختصر دورانیے کی ٹی ٹوئنٹی لیگز کھلاڑیوں کے لیے زیادہ موزوں ہوتی ہیں اور یہی وجہ تھی کہ وہ پی ایس ایل کھیلنے پر آمادہ ہوئے، حالانکہ ان کا ابتدائی منصوبہ آرام کرنے کا تھا۔

انہوں نے نشاندہی کی کہ آئی پی ایل تقریباً ڈھائی ماہ تک جاری رہتی ہے، جسے کم کر کے کھلاڑیوں کو ریلیف دیا جا سکتا ہے۔

زیمپا کو پہلی بار پی ایس ایل ڈرافٹ میں شامل کیا گیا جہاں کراچی کنگز نے انہیں بھاری معاوضے کے عوض ٹیم کا حصہ بنایا۔ ان کی شاندار بولنگ کی بدولت ٹیم نے ایونٹ میں بہترین آغاز کیا اور وہ نمایاں بولرز میں شامل ہیں۔

انہوں نے مزید کہا کہ آئی پی ایل میں غیر ملکی اسپنرز، خصوصاً لیگ اسپنرز کو وہ اہمیت نہیں دی جاتی جو دیگر لیگز میں ملتی ہے۔

ایڈم زیمپا کے مطابق ان کی اولین ترجیح اب آسٹریلیا قومی کرکٹ ٹیم کے لیے کھیلنا اور اپنی فٹنس برقرار رکھنا ہے تاکہ وہ مستقبل کے بڑے ایونٹس میں بھرپور شرکت کر سکیں۔