مشرق وسطیٰ کی کشیدگی، عالمی منڈی میں خام تیل کی قیمتوں میں اضافہ -

اسلام آباد(کیپٹل ٹائمز نیوز ڈیسک)مشرق وسطیٰ میں جاری کشیدگی اور عالمی سطح پر تیل کی سپلائی متاثر ہونے کے خدشات کے باعث خام تیل کی قیمتوں میں اضافے کا سلسلہ جاری ہے۔

رائٹرز کے مطابق برینٹ خام تیل کے مستقبل کے سودوں کی قیمت 34 سینٹ، یعنی 0.35 فیصد اضافے کے بعد 97.34 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (WTI) خام تیل 1.15 ڈالر، یعنی 1.26 فیصد اضافے کے بعد 92.63 ڈالر فی بیرل پر پہنچ گیا۔

ایران کی جانب سے امریکی حملوں کا جواب دینے کی دھمکی کے بعد خطے میں تنازع مزید طول پکڑنے کے خدشات بڑھ گئے ہیں، جس کے باعث عالمی تیل کی سپلائی متاثر ہونے کا خطرہ بھی بڑھ گیا ہے۔

رائٹرز کے مطابق مشرق وسطیٰ سے تیل کی برآمدات جنگ سے قبل تقریباً 18 ملین بیرل یومیہ سے کم ہو کر تقریباً 11 ملین بیرل یومیہ رہ گئی ہیں، جبکہ آبنائے ہرمز سے تیل کی ترسیل میں بھی نمایاں رکاوٹیں سامنے آئی ہیں۔

گزشتہ سیشن میں برینٹ خام تیل کی قیمت 24 جولائی کے بعد بلند ترین سطح پر پہنچ گئی تھی، جس سے عالمی توانائی مارکیٹ میں مزید سپلائی خدشات نمایاں ہوگئے ہیں۔