ایران-امریکا مذاکرات: پاکستانی قیادت پر امید، اسلام آباد ممکنہ میزبان؟ -

مشاہد حسین سید اور اعزاز چوہدری نے ایران اور امریکا کے درمیان جاری مذاکرات کے دوسرے راؤنڈ کے حوالے سے امید ظاہر کی ہے کہ یہ نتیجہ خیز ثابت ہوگا۔

نجی ٹی وی پروگرام کیپٹل ٹاک میں گفتگو کرتے ہوئے مشاہد حسین سید کا کہنا تھا کہ اگر مذاکرات کامیاب ہو جاتے ہیں تو امریکی صدر ڈونلڈ ٹرمپ خود معاہدے پر دستخط کرنے کے لیے اسلام آباد آ سکتے ہیں، حتیٰ کہ وہ نائب صدر جے ڈی وینس کو بھی اس موقع پر دستخط کا موقع نہیں دیں گے۔

انہوں نے مزید کہا کہ کامیاب مذاکرات کی صورت میں ایران کے صدر مسعود پزشکیان کا دورۂ پاکستان بھی متوقع ہو سکتا ہے، جو خطے میں سفارتی سرگرمیوں کو مزید تقویت دے گا۔

اسی پروگرام میں گفتگو کرتے ہوئے سابق سیکرٹری خارجہ اعزاز چوہدری نے بھی اس امید کا اظہار کیا کہ ایران اور امریکا کے درمیان مذاکرات کا دوسرا مرحلہ مثبت نتائج دے سکتا ہے۔

یاد رہے کہ امریکی صدر ڈونلڈ ٹرمپ نے حالیہ بیانات میں پاکستان کو آئندہ مذاکرات کے لیے ایک ممکنہ اور ترجیحی مقام قرار دیا ہے۔ امریکی اخبار New York Post سے گفتگو میں انہوں نے پاکستان کی عسکری قیادت، خصوصاً عاصم منیر کی کارکردگی کو سراہتے ہوئے کہا کہ مذاکرات کے لیے پاکستان کا انتخاب زیادہ موزوں ہو سکتا ہے۔

ان بیانات نے پاکستان کے ممکنہ کردار کو ایک بار پھر عالمی سفارتی منظرنامے میں نمایاں کر دیا ہے۔