رمشا خان اور خوشحال خان نے شادی کی تصدیق کر دی، مداحوں میں خوشی کی لہر -

اسلام آباد(کیپٹل ٹائمز نیوز ڈیسک)پاکستانی شوبز انڈسٹری کی معروف اداکارہ رمشا خان اور اداکار خوشحال خان نے بالآخر اپنی شادی کی باضابطہ تصدیق کرتے ہوئے مداحوں کے ساتھ خوشخبری شیئر کر دی۔

جوڑے نے جمعہ کے روز ایک مشترکہ سوشل میڈیا پوسٹ کے ذریعے اعلان کیا کہ وہ رشتۂ ازدواج میں منسلک ہو چکے ہیں۔ اس اعلان سے چند روز قبل رمشا خان نے انٹرٹینمنٹ ویب سائٹس کی جانب سے بغیر اجازت مبینہ شادی کی تصاویر شیئر کیے جانے پر ناراضی کا اظہار کیا تھا۔

اپنی پوسٹ میں جوڑے نے لکھا کہ بسم اللہ، ہم انتہائی خوشی کے ساتھ یہ اعلان کر رہے ہیں کہ ہم شادی شدہ ہیں، الحمدللہ۔ ہم اپنی زندگی کے اس نئے باب کا آغاز ایک ساتھ کرنے پر شکر گزار ہیں۔ ہم ان تمام افراد کے ممنون ہیں جنہوں نے ہمیں ہمیشہ محبت اور سپورٹ دی۔ اس موقع پر ہم اپنی پرائیویسی کے احترام کی درخواست بھی کرتے ہیں۔

اداکارہ نے حال ہی میں اپنے انسٹاگرام اکاؤنٹ پر نام تبدیل کر کے ’’رمشا خان خٹک‘‘ رکھ لیا، جبکہ پروفائل تصویر میں بھی خوشحال خان کی جھلک شامل کی، جس میں وہ اپنی شادی کی انگوٹھی دکھاتے نظر آ رہے ہیں۔ اس پیش رفت کے بعد مداحوں کے درمیان فوری طور پر مختلف قیاس آرائیاں گردش کرنے لگیں۔

مزید برآں، دونوں نے اپنے انسٹاگرام اکاؤنٹس پر اسٹوریز بھی شیئر کیں، جن میں رمشا خان اور خوشحال خان کو عروسی لباس میں دیکھا جا سکتا ہے، جبکہ اداکارہ آئینے کے سامنے سیلفی لیتی نظر آئیں۔ ایک اور جھلک میں یہ جوڑا اپنی پالتو بلی کے ساتھ خوشگوار لمحات گزارتا دکھائی دیا۔