اسلام آباد میں امریکی فوجی کارگو طیاروں کی آمد، سیکیورٹی سخت -

اسلام آباد(کیپٹل ٹائمز نیوز ڈیسک)فلائٹ ٹریکنگ ویب سائٹ کی رپورٹس کے مطابق اسلام آباد میں امریکی فوجی کارگو طیاروں کی آمد کا سلسلہ شروع ہو گیا ہے۔

رپورٹ کے مطابق بوئنگ C-17 گلوب ماسٹر III طیارے ساز و سامان کے ساتھ نور خان ایئر بیس پر لینڈ کر چکے ہیں۔

فلائٹ ڈیٹا کے مطابق 19 اپریل کو تین طیارے مختلف اوقات میں پہنچے: پہلا صبح 8:30، دوسرا 11:03 اور تیسرا دوپہر 2:40 پر اترا، جبکہ ایک اور طیارے کی آمد جاری راستے میں بتائی گئی ہے۔

رپورٹس کے مطابق مزید امریکی طیاروں کو جرمنی کے رامسٹین ایئر بیس اور اسپین کے مورون ایئر بیس پر ایندھن بھرتے ہوئے بھی دیکھا گیا ہے، جس سے ایک بڑے لاجسٹک آپریشن کا عندیہ ملتا ہے۔

اطلاعات کے مطابق یہ طیارے سیکیورٹی، مواصلاتی نظام اور دیگر معاون آلات لے کر آئے ہیں، جو عموماً اعلیٰ سطح کے دوروں سے قبل تعینات کیے جاتے ہیں۔ تاہم حکام کی جانب سے کسی باضابطہ دورے کی تصدیق نہیں کی گئی۔

دوسری جانب ذرائع کے مطابق ممکنہ اہم مذاکرات سے قبل غیر ملکی وفود کی ایڈوانس ٹیمیں بھی ملک میں موجود ہیں، جبکہ اسلام آباد اور راولپنڈی میں سیکیورٹی مزید سخت کر دی گئی ہے اور ریڈ زون کو ٹریفک کے لیے بند کر دیا گیا ہے۔