وزن کم کرنے والے انجیکشن جگر کی بیماری میں بھی مؤثر ثابت ہونے کا امکان، نئی تحقیق -

ایک نئی طبی تحقیق میں انکشاف ہوا ہے کہ وزن کم کرنے کے لیے استعمال ہونے والے انجیکشن جگر کی صحت بہتر بنانے میں بھی مددگار ثابت ہو سکتے ہیں، چاہے مریض کا نمایاں وزن کم نہ بھی ہو۔

سِینائی ہیلتھ کے محققین کے مطابق سیماگلوٹائیڈ، جو آنتوں کے ہارمون GLP-1 کی نقل کرتا ہے، جگر کے مخصوص خلیوں پر براہِ راست اثر انداز ہو کر سوزش اور زخم کو کم کر سکتا ہے۔

یہی فعال جزو مختلف ادویات جیسے ویگووی اور اوزیمپک میں استعمال کیا جاتا ہے، جو اس وقت موٹاپے اور ٹائپ 2 ذیابیطس کے علاج کے لیے بڑے پیمانے پر تجویز کی جا رہی ہیں۔

تحقیق میں یہ بھی سامنے آیا ہے کہ یہ دوا میٹابولک ڈس فنکشن سے وابستہ اسٹیٹو ہیپاٹائٹس (MASH) میں بھی مددگار ثابت ہو سکتی ہے، جو جگر میں چکنائی جمع ہونے سے پیدا ہونے والی ایک طویل مدتی بیماری ہے۔

محققین کے مطابق نتائج ابتدائی مگر حوصلہ افزا ہیں، اور مزید کلینیکل ٹرائلز کی ضرورت ہے تاکہ اس علاج کے مکمل اثرات اور حفاظت کا تعین کیا جا سکے۔