ملک بھر میں تیز ہواؤں اور گرج چمک کے ساتھ بارشوں کی پیشگوئی، مختلف علاقوں میں الرٹ جاری -

اسلام آباد(کیپٹل ٹائمز نیوز ڈیسک)محکمہ موسمیات پاکستان نے ملک کے مختلف علاقوں میں تیز ہواؤں اور گرج چمک کے ساتھ بارش کی پیشگوئی جاری کر دی ہے۔

محکمہ موسمیات کے مطابق بلوچستان کے بیشتر اضلاع میں موسم خشک اور جزوی ابر آلود رہے گا، تاہم کوئٹہ، زیارت، چمن، پشین، قلعہ عبداللہ اور قلعہ سیف اللہ میں تیز ہواؤں اور گرج چمک کے ساتھ بارش کا امکان ہے۔

اسی طرح نوشکی، شیرانی، موسیٰ خیل، لورالائی، ہرنائی، ژوب اور بارکھان میں بھی بارش کی توقع ظاہر کی گئی ہے۔

پنجاب کے مختلف شہروں بشمول لاہور میں رات کے وقت تیز ہواؤں کے ساتھ بارش کا امکان ہے۔

مزید برآں گلگت بلتستان اور آزاد کشمیر کے بعض علاقوں میں بھی بارش متوقع ہے جبکہ جہلم، گوجر خان، منگلا، حافظ آباد اور منڈی بہاؤالدین میں بھی گرج چمک کے ساتھ بارش کی پیشگوئی کی گئی ہے۔