آبنائے ہرمز میں امریکی کارروائی، 31 جہاز ری ڈائریکٹ؛ ایران نے مذاکرات ناکہ بندی سے مشروط کر دیے -

اسلام آباد(کیپٹل ٹائمز نیوز ڈیسک)امریکی سینٹرل کمانڈ (سینٹکام) نے بتایا ہے کہ آج رات آبنائے ہرمز میں امریکی فورسز نے 31 جہازوں کو ری ڈائریکٹ کر دیا ہے۔

امریکی میڈیا کے مطابق سینٹکام کا کہنا ہے کہ جاری ناکہ بندی کے نتیجے میں متعدد جہازوں کو بندرگاہوں کی جانب واپس بھیجا گیا یا انہیں متبادل راستوں پر جانے پر مجبور کیا گیا۔ سوشل میڈیا پلیٹ فارم ایکس پر جاری بیان میں کہا گیا کہ ری ڈائریکٹ کیے جانے والے جہازوں میں زیادہ تر آئل ٹینکرز شامل تھے اور تمام جہازوں نے امریکی فورسز کی ہدایات پر عمل کیا۔

سینٹکام کے مطابق ایرانی بندرگاہوں کی ناکہ بندی کے آپریشن میں 10 ہزار سے زائد امریکی فوجی، 17 جنگی جہاز اور 100 سے زیادہ طیارے حصہ لے رہے ہیں۔

ادھر ڈونلڈ ٹرمپ نے پاکستان کی درخواست پر جنگ بندی میں توسیع کا اعلان کیا ہے، تاہم واضح کیا ہے کہ آبنائے ہرمز میں امریکی ناکہ بندی برقرار رہے گی۔

یاد رہے کہ اس سے قبل بھی امریکی فورسز نے آبنائے ہرمز میں ایک ایرانی تجارتی جہاز کو نشانہ بنا کر قبضے میں لیا تھا، جسے ایران نے جنگ بندی کی کھلی خلاف ورزی قرار دیا تھا۔

دوسری جانب ایران نے مذاکرات کو ناکہ بندی کے خاتمے سے مشروط کر دیا ہے۔ ایرانی مؤقف کے مطابق امریکا مذاکراتی عمل کو دباؤ کا ذریعہ بنا رہا ہے، جبکہ دھمکیاں اور وعدہ خلافیاں ہی بات چیت میں سب سے بڑی رکاوٹ ہیں۔