میچ کے بعد جذباتی منظر، معین علی کو گفتگو کے دوران پانی طلب کرنا پڑا -

پاکستان سپر لیگ 11 میں کراچی کنگز کو پشاور زلمی کے خلاف بھاری شکست کے بعد ایک جذباتی منظر بھی دیکھنے میں آیا۔

میچ کے بعد میڈیا سے گفتگو کرتے ہوئے انگلینڈ سے تعلق رکھنے والے آل راؤنڈر معین علی کی آواز رندھ گئی۔ گفتگو کے دوران گلے کی خرابی کے باعث انہیں پانی مانگنا پڑا، جس پر ایک صحافی نے فوری طور پر انہیں پانی کی بوتل پیش کی۔ پانی پینے کے بعد ان کی آواز میں بہتری آئی اور انہوں نے اپنی بات جاری رکھی۔

دوسری جانب میچ میں کراچی کنگز کی کارکردگی انتہائی مایوس کن رہی۔ پی ایس ایل 11 کے 17ویں میچ میں پشاور زلمی کے خلاف ٹیم مکمل طور پر ناکام رہی اور اسے ہوم گراؤنڈ پر 159 رنز سے بدترین شکست کا سامنا کرنا پڑا۔

شائقین کرکٹ اس شکست اور میچ کے بعد پیش آنے والے جذباتی لمحے پر مختلف ردعمل دے رہے ہیں، جبکہ ٹیم کی کارکردگی پر بھی سوالات اٹھائے جا رہے ہیں۔